మ్యాగీని త్వరలోనే ఇండియాలోకి తీసుకువస్తాం

Posted: 08/01/2015 10:01 PM IST

దేశ వ్యాప్తంగా నిషేధానికి గురైన మ్యాగీ న్యూడుల్స్‌ను మళ్లీ మార్కెట్లలోకి తీసుకువస్తామని నెస్లె ఇండియా నూతన అధినేత సురేష్ నారయణ్ పేర్కొన్నారు. మ్యాగీ తయారీలో సీసం వాడకం అధికంగా ఉందంటూ ఇటీవల దాని అమ్మకాలు దేశవ్యాప్తంగా నిలిపివేసిన విషయం తెలిసిందే. ఈ నేపథ్యంలో నెస్లె ఇండియాకు ఎండీగా ఉన్న ఎటైన్ బెనెట్ జులై 25న తన పదవి నుంచి దిగిపోయారు. ఈ క్రమంలో భారత్‌లో వ్యాపారాలను తిరిగి మెరుగుపరిచేందుకు మనిలాలో పనిచేస్తున్న సురేష్ నారయణ్‌(55)ను నెస్లే ఇండియా చీఫ్‌గా సంస్థ నియమించింది.

ఈ మేరకు సురేష్ శనివారం అధికారికంగా బాధ్యతలు స్వీకరించారు. ఈ సందర్భంగా ఆయన మాట్లాడుతూ మ్యాగీ తయారీపై తాము అన్ని రకాల చర్యలు తీసుకుంటున్నామని, ప్రస్తుతం ఈ కేసు కోర్టులో ఉన్నందున ఎలాంటి వ్యాఖ్యలు చేయబోనన్నారు. సోమవారం బాంబే హైకోర్టు ఈ కేసులో తన తీర్పును వెల్లడించనుందని, కోర్టు తీర్పుననుసరించి త్వరలోనే మ్యాగీ అమ్మకాలు మొదలుపెడతామని చెప్పారు. మ్యాగీతో పాటుగా డెయిరీ ఉత్పత్తులు, చాక్లెట్లు అన్నింటి అమ్మకాలను పెంచడం ద్వారా భారత్‌లో తమ మార్కెట్‌ను అభివృద్ధి చేసే ప్రయత్నాలు చేస్తామన్నారు.

జి. మనోహర్